طبيب ومهرج ويتيوبر قصة نجاح علي غزلان شاب طموح

طبيب ومهرج ويتيوبر قصة نجاح علي غزلان شاب طموح 

عرض بواسطة محمود هاشم 

21/08/2020

صورة           علي غزلان 

البداية 

 بيقول علي  "سنه ٢٠١٢ .. مكنش معايا جنيه في جيبي اكل بيه او اخرج بيه او حتي ادفع فلوس المدينه الجامعيه اللي قاعد فيها ،، اضطريت انزل كارفور اسكندريه والبس لبس مهرجين والعب مع الاطفال في المول وباخد في نهايه الاسبوع ٢٨٠ جنيه .

رحلة الكفاح 

- متولدتش في بقي معلقه دهب زي ماالناس بتقول .. انا مولود في كفرالشيخ ولما ذاكرت واجتهدت دخلت كليه طب اسكندريه بمجموع ٩٩،٤ ،، واكتشفت ان الحياه في اسكندريه مختلفه عن كفرالشيخ ،، المصروف اللي كنت باخده مكنش بيكفي اكلي ومصاريفي ،،، كنت محتاج أخد كورسات عشان اقدر انجح في الكليه ومكنش معايا فلوس .. لدرجه اني كنت بخلي صحابي اللي بياخدوا كورسات يسجلوا الكورس واخده افرغه في ورق واذاكره .

- ٣ سنين من ٢٠١١ لحد ٢٠١٤ مقضيها كشري عشان اوفر كل جنيه باخده او بكسبه عشان استغله في حاجه كويسه قدام .

- اشتغلت شغلانات كتيره في فتره الجامعه عشان اقدر اوفر فلوس بجانب المصروف اللي اهلي بيبعتوه وعشان مطلبش منهم فلوس زيادة . لان مبحبش اتقل علي حد وخيرهم مغرقني .

- بدأت اعمل حفلات ستاند اب كوميدي في الجامعات .. ببلاش في البدايه . وبعد مااتعرفت بدأت اخد فلوس واستخدم الفلوس دي اني اخد كورسات في الطب : باثولوجي وفارما وبارا ،، لحد ماقررت ان الحجات اللي بقولها في الحفلات اقولها في فيديوهات وربنا وفقني ومن البدايه الناس حبتني وبدأت اجيب مشاهدات . 

- في يوم كنت بصلي التراويح في رمضان شافني واحد عرفني من فيديوهاتي وكان عنده مجموعه شركات .. اقترح عليا اسوقله منتجاته عندي ع الصفحه .. عملت كده وخدت منه فلوس وبدأ الشغل من هنا .

التطور والمعرفه 

- قررت اطور من نفسي ودخلت علي النت وخدت كورسات ماركيتنج وبدأت اسعي واروح للشركات الصغيره امسكلهم شغلهم .. الشركات الصغيره بدأت تكتر معايا .. الشركات الكبيرة بدأت تكلمني .. لحد ماوصلت لمرحله اني مسكت شغل ١٩ ابلكيشن جوه وبره مصر ،، وبدأت اكسب فلوس كويسه نسبياً .

"- سافرت الصين وهناك اتسرق مني ٥ الاف دولار .. وكانوا كل ماأملك .. ورجعت مصر عشان أبدأ من الصفر من اول وجديد ." 

سلم النجاح 

استدرج علي في حديثه قائلا :

- "بعد مااتخرجت من الجامعه مطاعم كتير كلموني اعملهم ماركيتنج .. بدأت اعمل والمطاعم بدأت تكتر .. لقيت المطعم اللي بعمله ماركيتنج المبيعات عنده بتكتر وبيستمر معايا .. فقلت ليه مفتحش البيزنيش الخاص بيا ،، وبعد سنه شغل وتحوييش وسلف من ناس فتحت مطعمي " ستوماك في اكتوبر " والحمد لله بقي رقم ١ في اكتوبر في اقل من سنه ، لدرجه اني فتحت فرع تاني في مدينه نصر .

- طورت من نفسي والفلوس اللي بتيجي من المطعم بحوشها لحد مافتحت مصنع صغير للمواد الغذائيه اورد بيه لمطعمي وبقيه المطاعم والمحلات .

- بفتح المركز الطبي الخاص بيا .. بس وقفت عشان مشاكل الكورونا والتصاريح وباذن الله بعد المحنه افتحه ويبقي اكبر مركز طبي في مصر .

- بعد ماكان مش معايا فلوس ادفعها عشان اقعد في المدينه الجامعيه وبتشعبط في المواصلات ، بقي معايا شقتي وعربيتي بتعبي وشقايا وبالحلال .

كتاب 

استكمل علي قصته قائلا :

 لما جيت اعمل كتاب .. اتعرضت لشتايم وانتقادات كتيره غير مبرره من ناس مقروش الكتاب اصلا .. شتايم من اول مالغلاف نزل اصلا .. بالرغم ان الكتاب مش بيتكلم عني اصلا ولا انا موضوع الكتاب اصلا لان الكتاب هو دراسه للشخصيات ... 

الناس بدأت تشتم فيا .. وبدأوا يجيبوا صور مش من كتابي وينسبوها ليا ويقولوا شوفوا الخره اللي بيكتبه .. والله العظيم مفيش ولا صورة من صور الكتب اللي نزلت الفتره دي من كتابي .

انا من طبعي لما حد بيتكلم عليا بسكت مش بتكلم لاني مبحبش ارد علي الانتقادات ،، شخصيتي كده ومش عارف اغيرها .. بسيب اللي بيحبني يدافع عني وانا متاكد انهم مش هيصدقوا اي هبل من اللي بيتقال واللي بيكرهني يكره براحته مش هينقصني شئ وبدعي ربنا يغير نظرته عني .

من ٦ شهور عملت مسابقات علي السوشيال ميديا تبع شركات وكنا بناخد جزء من الفلوس نشتري بيها جوايز نوزعها ع الناس ، وجزء تاني من الفلوس نعمل بيه خير زي اننا اشترينا اطراف صناعيه لناس فقدتهم . وطلعنا غارمات من السجن بالالوفات وموائد رحمن وعجول بنوزعها ع المحتاجين وحجات كتير .. برضه اتعرضت للانتقادات وناس بتقولك ده بيطلع في المسابقه ملايين وفتح المطاعم بالمسابقات وخلافه .

مع ان المطعم والحجات دي كلها اللي عملتها عاملها من سنين .. والمسابقات كانت من ٦ شهور بعد ماربنا اكرمني .

وكل الكلام اللي اتقال كذب وعزة جلال الله .. بس سكتت علي امل ان ربنا ياخدلي حقي من اللي بيتكلم وربنا واكيد اللي يعرفني كويس مش هيصدق اي حاجه من اللي بتتقال .

بيكمل ويقول :

-  انا عافرت وتعبت واشتغلت شغلانات كتير في فتره دراستي عشان ربنا ييسر حياتي ومبقاش عاله علي نفسي ولا اسرتي ،، عايش لوحدي بقالي اكتر من ٨ سنين .. بعافر وبتعب وبسافر وبشتغل ومبنمش عشان ربنا ييسرها معايا ..

يمكن اغلب الفلوس جتلي من الماركيتنج والاعلانات اللي بعملها . لكن انا مصحتش من النوم لقيت عندي صفحه في ملايين .. انا تعبت واتمرمطت واحترمت عقول الناس وسعيت ان كل اللي يتابعني يستفاد مني ولو بمعلومه صغيره . 

يمكن في ناس بتحبني  ، وفي ناس برضه كتيره بتكرهني  ، وانا اكيد مش فرحان بكره الناس ليا، نفسي اغير وجهه نظرهم فيا وبحاول ويارب ربنا يقدرني واغير وجهه نظرهم 

‎ده كله عشان مسمعتش كلام الناس وركزت في حلمي وموهبتي وشغفي اني عايز اكون انسان مختلف وانجح واحقق نفسي وذاتي .

‎ركزت اني عايز لما اموت ميبقاش يتكتب علي قبري عاش عادي ومات عادي ،، لا عايز لما اموت يتقال عني اني عملت فرق وعمّرت في الارض أو حتي ساعدت في ده وحققت نفسي .

‎

‎واوعي حد يقولك انك عشان دخلت كليه معينه ده معناه انك فاشل او انك مش هتقدر تعمل الحاجه اللي نفسك فيها .

علي غزلان في اصعب كليه عمليه في مصر والحمد لله اتخرج وبقي دكتور وحقق حجات كتير غيره في سنه مقدرش يحقق ربعها .

الخلاصة 

‎متسمعش كلام الناس واجري ورا حلمك مهما كان .

،، واتعب عشان كده كده هتتعب ، هتتعب لو عشت ملكش لازمة من غير هدف ، وهتتعب لو عشت ليك هدف ، بس ساعتها التعب هيكون ليهم طعم وقيمه ، ولو كده كده هتتعب اتعب عشان حاجه تستاهل ، حاجه تنفع الناس ف الدنيا والاخرة ، ساعتها ربنا هيفرحك ف الدنيا والاخرة.

#ابني_نفسك_ومتبنيش_لنفسك

إقرأ أيضا :